Қазақстаннан мәнерлеп сырғанаудан әлем чемпионатында кімдер өнер көрсетеді
Прагада (Чехия) өтетін мәнерлеп сырғанаудан 2026 жылғы әлем чемпионаты маусымның басты жарыстарының бірі болмақ. Биылғы додада бірқатар жетекші спортшылардың қатыспауы жаңа есімдердің жарқырауына мүмкіндік беріп отыр.
Қазақстан құрамасы бұл турнирде екі спортшымен өнер көрсетеді. Ерлер арасында ел намысын Диас Жиренбаев қорғаса, әйелдер сайысында Софья Самоделкина мұз айдынына шығады.
Айта кетейік, Олимпиада чемпионы Михаил Шайдоров бұл жолы әлем чемпионатына қатыспайды. Бұл жағдай ерлер арасындағы бәсекенің сипатына әсер етпек.
Самоделкина үшін бұл маусым сәтті өтуде. Ол халықаралық жарыстарда тұрақты нәтиже көрсетіп, Гран-при кезеңдерінің бірінде күміс медаль жеңіп алды. Бұған дейінгі әлем чемпионатында 14-орын алған спортшы биыл өз көрсеткішін жақсартуға ниетті. Сарапшылар оның үздік бестікке ену мүмкіндігін де жоққа шығармайды.
Ал Жиренбаев халықаралық тәжірибесін арттырып келеді. Ол Challenger сериясындағы турнирлерге қатысып, Олимпиада жолдамасына таласқанымен, іріктеу кезеңінде жоғары нәтижеге жете алмады.
Осылайша, Қазақстан құрамасы жаңа құраммен әлемдік аренада бақ сынап, маусымды қорытындыламақ.
