Қазақстан Премьер-лигасының 20-туры турнирлік кестедегі маңызды өзгерістермен аяқталды. Шымкенттің «Ордабасы» өз алаңында «Тобылды» жеңіп, қайтадан бірінші орынға көтерілсе, «Астана» сырт алаңда жеңіске жетіп, үздік үштіктегі орнын нығайтты.
«Ертіс» – «Каспий» – 3:2
Павлодардағы кездесу турдың ең тартысты матчтарының біріне айналды. Алдымен «Каспий» Ндомбасидің голымен алға шыққанымен, үзілістен кейін «Ертіс» ойын тізгінін қолға алды. Жан-Морель По дубль авторы атанып, жеңіс голын матчтың қосымша уақытында пенальтиден соқты. Осылайша павлодарлықтар қатарынан екінші жеңісіне қол жеткізді.
«Қызылжар» – «Ақтөбе» – 3:1
Игорь Черевченко бас бапкер ретіндегі алғашқы матчында «Ақтөбе» жеңіліске ұшырады. Петропавлдықтар сан басымдығын тиімді пайдаланып, кездесудің соңында екі гол соғып, сенімді жеңіске жетті. Ақтөбеліктер матчты тоғыз ойыншымен аяқтады.
«Атырау» – «Жетісу» – 1:1
Қатарынан бірнеше жеңілістен кейін кездескен қос команда жеңімпазды анықтай алмады. Қуаныш Қалмұратов пенальтиден есеп ашса, екінші таймда Шоқан Абзалов таразы басын теңестірді.
«Оқжетпес» – «Алтай» – 4:1
Көкшетаулық клуб өз алаңында ірі жеңіске жетті. Владислав Васильев есеп ашса, Оралхан Өміртаев дубль авторы атанды. Тағы бір голды Владимир Воменко соқты. Бұл жеңіс «Оқжетпеске» медаль үшін күресті жалғастыруға мүмкіндік берді.
«Ұлытау» – «Астана» – 0:2
Жезқазғанда өткен кездесудің басты кейіпкері Марин Томасов болды. Хорватиялық жартылай қорғаушы дубль жасап, елордалық клубқа маңызды үш ұпай сыйлады. Соның арқасында «Астана» турнирлік кестедегі үшінші орнын сақтап қалды.
«Жеңіс» – «Елімай» – 0:0
Астанада өткен матчта есеп ашылған жоқ. 76-минутта «Елімай» ойыншысы Арсен Әшірбек қызыл қағаз алып, командасы матчтың қалған бөлігін он ойыншымен өткізді. Дегенмен «Жеңіс» сан басымдығын пайдалана алмады.
«Ордабасы» – «Тобыл» – 2:0
Турдың орталық матчында «Ордабасы» чемпиондық бәсекедегі басты қарсыластардың бірін жеңді. Эльхан Астанов алғашқы таймда есеп ашса, ойын соңында Сергей Малый екінші голды соғып, жеңісті бекітті. «Тобыл» 77-минутта Наурызбек Жағоров алаңнан қуылғаннан кейін матчты он ойыншымен аяқтады.
Тур қорытындысы
20-турдан кейін «Ордабасы» 46 ұпаймен қайтадан турнир кестесінің бірінші орнына көтерілді. «Қайрат» көшбасшыдан бір ұпай қалып, екінші орында келеді. «Астана» үшінші орнын сақтап қалса, «Оқжетпес» пен «Ақтөбе» еурокубок жолдамасы үшін күресті жалғастыруда.
Айта кетейік, осы тур аясындағы «Қайсар» – «Қайрат» кездесуі бұған дейін өтіп, алматылық клуб 2:1 есебімен жеңіске жеткен болатын. Дегенмен «Ордабасының» «Тобылды» жеңуі шымкенттіктерге чемпионат көшбасшылығын қайтаруға мүмкіндік берді.
