Астанада VI Азия Олимпиадалық Кеңесінің Спортшылар форумы өтеді
Бұл форум — құрлық спортшылары бас қосып, пікір алмасып, спортты дамыту, олимпиадалық құндылықтарды нығайту және атлеттердің мүдделерін қорғау мәселелерін талқылайтын маңызды шара.
Форумға Азияның 45 ұлттық олимпиадалық комитетінің өкілдері, Халықаралық Олимпиадалық комитетінің мүшелері мен АОК басшылары қатысады. Қатысушылар саны 120-дан асады.
Бағдарламада пікірталас алаңдары, жұмыс топтары, семинарлар және ашық диалогтар жоспарланған. Сондай-ақ форум аясында Астананың Орталық саябағында 2026 жылғы Аичи-Нагоя Азия ойындарын қолдауға арналған символдық Fun Run жүгіру шарасы ұйымдастырылады.
Спикерлер қатарында Olympic Solidarity бағдарламасы директорының орынбасары Оливье Ньямки, осы бағдарламаның құрлықтық менеджері Эдвард Кенсингтон, ХОК Спортшылар комиссиясының төрайымы Эмма Терхо, осы комиссияны қолдау жөніндегі менеджер Артур Милрой, комиссия мүшесі Масома Али Зада, ХОК мүшесі Чжан Хун, АОК Спортшылар комиссиясының төрағасы Нин Дин, комиссияның тең төрағасы Шива Кешаван, АОК Спортшылар комиссиясының мүшелері Шайна Энг пен Тай Терри, АОК Спортшылармен жұмыс департаментінің менеджері Джамьянг Намгьял, ҚР ҰОК Спортшылар комиссиясының төрайымы әрі АОК Атқару комитетінің мүшесі Ольга Рыпакова, фристайл-акробатикадан үш бірдей Олимпиада қатысушысы Жанбота Алдабергенова, сондай-ақ, ҚР ҰОК Спорт департаментінің жетекші менеджері Айым Жетібаева бар.
Эдвард Кенсингтон мен Оливье Ньямки Olympic Solidarity бағдарламасы аясында спортшыларға арналған шәкіртақылар туралы мәлімет берсе, Эмма Терхо, Чжан Хун және Масома Али Зада ХОК Спортшылар комиссиясының жұмысына қатысты жаңалықтармен бөліседі. Артур Милрой комиссияны қолдау мүмкіндіктерін түсіндіреді. Сондай-ақ AINAGOC және Аичи-Нагоя 2026 ұйымдастыру комитеттерінің өкілдері алдағы Азия ойындарына қатысты өзекті ақпаратпен бөліседі.
Форумға Олимпиада ойындарының жүлдегерлері де қатысады. Олардың қатарында оңтүстіккореялық бобслейші Юнджон Вон, таеквондошы Рохулла Никпай (Ауғанстан), боксшы Мавзуна Чориева (Тәжікстан), таеквондошы Багери Мохаммад (Иран), каноеде ескек есуші Такуя Ханеда (Жапония), таеквондошы Чанатип Сонгхам (Таиланд) бар.
Форум нәтижесінде спортшылардың жағдайын жақсартуға және олардың Олимпиадалық қозғалысқа қосатын үлесін арттыруға арналған жаңа ұсыныстар мен бастамалар қабылданады.
