Юлия Путинцева US Open турниріндегі алғашқы матчында жеңіске жетті

Қазақстандық теннисші Юлия Путинцева АҚШ ашық чемпионатының (US Open) екінші айналымына жолдама алды.

Әлемдік рейтингте 55-орында тұрған Путинцева алғашқы айналымда Италия өкілі Элизабетта Кочареттомен (WTA №85) кортқа шықты. Қарсыласы бірінші партияда 4:1 есебімен алға шыққанымен, Юлия камбэк жасап, қатарынан бес гейм алып, сетті өз пайдасына аяқтады — 6:4.

Екінші сет те тартысты өтті. Тай-брейкке ұласқан кезеңде Путинцева жинақылық танытып, 7:6 (7:4) есебімен басым түсті.

• Ойын 1 сағат 56 минутқа созылды

• Путинцева 10 брейк-пойнттың 5-ін тиімді пайдаланды

• Кочаретто 3 эйс жасап, 8 мүмкіндіктен 4 брейкке қол жеткізді

Енді Юлия екінші айналымда ресейлік Анна Калинская (WTA №29) немесе америкалық Клерви Нгунуэмен (WTA №178) кездесуі мүмкін.

Осылайша, отандық спортшы ұзаққа созылған алты матчтық жеңілістер сериясын тоқтатып, үлкен дулыға турнирінде сәтті старт алды.