Орал қаласындағы «Жайық Арена» спорт кешенінде футзалдан Қазақстан суперкубогы үшін кездесу аяқталды. Бұл матчта ел чемпионы «Қайрат» пен Қазақстан кубогының иегері «Семей» командалары өзара мықтыны анықтады.
Тартысты өткен ойында екі команда да қауіпті шабуылдар ұйымдастырып, бірнеше мүмкіндікке ие болды. Алайда матч тағдырын бір ғана дәл соққы шешті — «Қайрат» командасына жаңадан қосылған бразилиялық ойыншы Рафао жалғыз голдың авторы атанды.
Айта кетейік, маусым айының соңында өткен чемпионаттың плей-офф кезеңінде дәл осы екі команда кездесіп, «Қайрат» «Семейді» 3:1 есебімен жеңіп, ел чемпионы атанған болатын. Ал көктемде өткен Қазақстан кубогының финалында «Семей» алматылықтарды 5:1 есебімен ойсырата ұтып, кубокты иеленген еді.
Осы жолғы кездесу екі ұжым арасындағы бәсекелестіктің жалғасы іспеттес өтті. Бұл жолы суперкубок Алматыға кетті.
Осылайша, Қазақстанда футзалдың жаңа маусымы ресми түрде бастау алды.
