Қазақстанда бұқаралық футболды дамытуға бағытталған жаңа ұлттық жоба — «Әуесқой лига» іске қосылды. Бұл бастама мыңдаған футболсүйер жанкүйерге тұрақты түрде доп теуіп, кәсіби дамуға мүмкіндік беруді көздейді.
Қазақстан футбол федерациясының Бас хатшысы Давид Лорияның айтуынша, жобаның басты мақсаты — футболды әр адамның өмірінің мерекесіне айналдыру.
«Әуесқойлар өздерін үлкен футболдың бір бөлшегі ретінде сезінуі тиіс. Ең үздік ойыншылар кәсіби лигаға өту мүмкіндігіне ие болады», — деді Лория.
Әуесқой лиганың ерекшелігі — жеңімпаз және үздік командалар кәсіби деңгейге дейін өсіп, тіпті УЕФА өңірлік кубогында Қазақстан атынан өнер көрсету мүмкіндігіне ие бола алады.
Жоба елдің барлық өңірлерін қамтиды. Оған 260-тан астам команда тіркеліп, 5 мыңнан астам ойыншы қатысады деп күтілуде. 34 жерде өтетін 1500-ден астам матч күнтізбеге енгізілген.
Ағымдағы маусымның финалдық кезеңі 1–10 қазан аралығында өтеді. Қорытынды ойындар Шымкент, Алматы немесе Талдықорған қалаларының бірінде ұйымдастырылуы мүмкін.
Ұйымдастырушылар инфрақұрылымда кемшіліктер бар екенін мойындайды, алайда бұл жобаны іске асыруға кедергі келтірмейді дейді.
