Астанада Премьер-лига төрешілеріне арналған оқу семинары өтті
Астанада Қазақстан Премьер-лигасының матчтарына қызмет көрсететін төрешілер, төреші көмекшілері және VAR мамандарына арналған оқу семинары өз жұмысын аяқтады. Іс-шара чемпионаттың екінші бөлімі қарсаңында мамандардың кәсіби дайындығын арттыру мақсатында ұйымдастырылды.
Семинарға еліміздің түкпір-түкпірінен келген шамамен 65 төреші қатысты. Бағдарлама дәстүрлі түрде Ойын ережелері мен VAR жүйесіне қатысты теориялық тестілеуден басталды. Қатысушылар өз білімдерін тексеріп, маусымның жалғасына дайындық деңгейін растады.
Оқу жиыны барысында төрешілер мен олардың көмекшілері УЕФА ұсынған бейнематериалдарды, сондай-ақ Қазақстан Премьер-лигасы, Бірінші және Екінші лига матчтарындағы түрлі ойын эпизодтарын талдады. Теориялық сабақтар мен топтық жұмыстар шешім қабылдаудағы бірізділікті арттыруға және төрешілік сапасын жақсартуға бағытталды.
Сонымен қатар қатысушылар «Астана Арена» стадионында арнайы фитнес-тест тапсырып, жоғары деңгейдегі матчтарға қызмет көрсетуге қажетті физикалық дайындықтарын тексерді.
Семинар аясында қауіпсіздік пен спорттық адалдық мәселелеріне арналған арнайы сессия да ұйымдастырылды. Оған Қазақстан футбол федерациясының қауіпсіздік және интегрити қызметінің жетекшісі қатысып, жарыстардың әділдігін қамтамасыз ету және заманауи қауіп-қатерлердің алдын алу бағытындағы жұмыстар туралы баяндады.
Семинар қорытындысы бойынша төрешілер корпусы теориялық білімдерін жаңартып, практикалық дағдыларын жетілдірді. Мамандар алған тәжірибелерін Қазақстан чемпионатының алдағы турларында қолдануға дайын екендерін жеткізді.
