Қытайдың Нанкин қаласында 5–8 қараша аралығында батуттағы гимнастикадан 2026 жылғы әлем чемпионаты өтеді. Халықаралық жарыста Қазақстан құрамасының бес спортшысы ел намысын қорғайды.
Халықаралық гимнастика федерациясы (FIG) әлем біріншілігіне қатысатын спортшылардың алдын ала тізімін жариялады.
Қазақстан құрамасының сапына Роман Барков, Данил Мусабаев, Никита Тумаков, Ерлан Тасмағамбетов және Виктория Бутолина енді.
Ұлттық құрама мүшелерінің қатарында 2026 жылы Жапонияда өткен Азия ойындарының қола жүлдегері Ерлан Тасмағамбетов те бар. Ол Нанкиндегі әлем чемпионатында да жүлделі орындар үшін сынға түседі.
Әлем біріншілігі төрт күнге созылады. Қазақстандық гимнасттар халықаралық деңгейдегі қарсыластарымен бәсекеге түсіп, үздік нәтиже көрсетуге тырысады.
Айта кетейік, жарияланған құрам алдын ала жасалған. Жарыс басталғанға дейін қатысушылардың қорытынды тізіміне өзгерістер енгізілуі мүмкін.
