Қазақстан волейболдан Орталық Азия чемпионатындағы екінші ойынында жеңіліс тапты

Пәкістанның Исламабад қаласында өтіп жатқан волейболдан Орталық Азияның ашық чемпионатында Қазақстан құрамасы екінші кездесуін өткізді. Тартысты матчта ұлттық құрама Өзбекстан командасына 2:3 есебімен жол берді.

Кездесу бес партияға созылып, 19:25, 25:22, 27:29, 26:24, 14:16 есебімен аяқталды. Екі команда да жеңіс үшін соңына дейін күрескенімен, шешуші партияда қарсылас сәл басым түсті.

Осылайша, Қазақстан құрамасы турнирдегі екінші матчынан кейін бір жеңіс пен бір жеңіліске ие болды. Еске салсақ, алғашқы кездесуде жерлестеріміз Непал құрамасын 3:2 есебімен жеңген болатын.

Айта кетейік, Қазақстан ұлттық құрамасы келесі ойынын 24 шілдеде Бангладешке қарсы өткізеді. Турнир Пәкістанның Исламабад қаласында жалғасып жатыр.