Астанада Қазақ ұлттық спорт университеті ресми түрде ашылды
Астанада Орталық Азиядағы спорт саласындағы ірі білім беру жобаларының бірі – Қазақ ұлттық спорт университетінің ресми ашылу рәсімі өтті.
Салтанатты іс-шара New Era of Sport: KNUS 2026 халықаралық форумы аясында ұйымдастырылды. Форумға мемлекеттік органдардың өкілдері, халықаралық спорт ұйымдарының басшылары, олимпиадалық қозғалыс мүшелері, шетелдік жоғары оқу орындарының өкілдері, ғалымдар мен сарапшылар қатысты.
Университеттің жаңа кампусының ашылуы оқу орнын жаңғыртуға бағытталған бес жылдық жұмыстың алғашқы кезеңінің аяқталғанын білдіреді. Осы уақыт ішінде білім беру ұйымы халықаралық әріптестігін кеңейтіп, ғылыми әлеуетін күшейтіп, жоғары жетістіктер спорты мен спорт индустриясына қажетті мамандар даярлауға арналған заманауи экожүйе қалыптастырды.
Университеттің құрылтайшысы Нұрасыл Медеудің айтуынша, жаңа оқу орны спорт саласына арналған заманауи білім беру және ғылыми орталық ретінде қалыптасып, халықаралық деңгейдегі жаттықтырушыларды, спорт дәрігерлерін, педагогтерді, ғалымдар мен спорт менеджерлерін даярлауға басымдық береді.
Форум барысында халықаралық ұйым өкілдері де сөз сөйлеп, Қазақстанның спорт ғылымын дамытудағы бастамаларына оң бағасын берді. Біріккен күрес әлемі ұйымының (UWW) президенті Ненад Лалович халықаралық стандарттарға сай мамандар даярлаудың маңызын атап өтсе, Халықаралық киберспорт федерациясының (IESF) президенті Влад Маринеску дәстүрлі спорт пен цифрлық технологияларды ұштастыратын мұндай оқу орнының ашылуын маңызды қадам деп бағалады.
Іс-шара аясында Ненад Лалович пен Влад Маринескуға «Қазақ ұлттық спорт университетінің Құрметті профессоры» атағы берілді. Сонымен қатар студенттер академиялық адалдық, әділ бәсекелестік және спорттық этика қағидаларын қолдайтын Студенттер хартиясына қол қойды.
Форум қонақтарына университеттің ғылыми зертханалары, білім беру хабтары, цифрлық инфрақұрылымы мен заманауи спорт кешендері таныстырылды.
Қазақ ұлттық спорт университеті спорт ғылымын дамытуға, инновациялық жобаларды іске асыруға және әлемдік спорт ұйымдарымен халықаралық ынтымақтастықты кеңейтуге бағытталған жаңа буын білім беру және ғылыми орталық ретінде жұмысын бастады.
