Анна Данилина «Ролан Гаррос» турнирінің үшінші айналымына шықты
Қазақстанның жұптық сындағы бірінші ракеткасы Анна Данилина Франция ашық чемпионатындағы сәтті өнерін жалғастырып жатыр.
Әлемдік жұптық рейтингте алтыншы орында тұрған қазақстандық теннисші сербиялық Александра Круничпен бірге турнирдің үшінші айналымына жолдама алды.
Екінші кезеңде жарыстың екінші нөмірлі жұбы саналған Данилина мен Крунич Австралия өкілі Майя Джойнт пен бельгиялық Хенне Вандевинкельден құралған тандемді 6:2, 6:3 есебімен сенімді түрде жеңді.
Қазақстандық-сербиялық жұп матчтың алғашқы минуттарынан бастап бастаманы өз қолына алып, қарсыластарына мүмкіндік берген жоқ. Кездесу екі сетке ғана созылды.
Енді ширек финалға шығу үшін Анна Данилина мен Александра Крунич украиналық Даяна Ястремская мен Ангелина Калинина жұбына қарсы ойнайды.
Айта кетейік, Анна Данилина Париждегі турнирде аралас жұптар сайысында да өнер көрсетіп жатыр. Ол америкалық Джей-Джей Трэйсимен бірге микст бағдарламасының үшінші айналымына шығу үшін келесі матчын өткізеді.
Қазіргі таңда Анна Данилина — 2026 жылғы «Ролан Гаррос» турнирінде Қазақстан атынан жарысты жалғастырып жатқан соңғы теннисші.
