ҰОК кеңсесінде Қазақстанда триатлон мен пара триатлонды дамыту мәселелері талқыланды
Қазақстан Республикасы Ұлттық Олимпиадалық комитетінде триатлон мен пара триатлонды дамыту мәселелеріне арналған жұмыс кездесу өтті.
Өзекті тақырыптарды талқылауға ҚР ҰОК бас хатшысы Әлімжан Ақаев, Қазақстан Ұлттық Паралимпиадалық комитетінің бас хатшысы Олжас Ақпамбетов, ҚР Туризм және спорт министрлігінің Спорт және дене шынықтыру істері комитеті төрағасының орынбасары Нұрлан Есембаев, интеллектуалдық дамуында ерекшеліктері бар жандарға арналған спорт федерациясының (ID SPORT) президенті Дина Темірғалиева, Астана қаласының федерация президенті Төлепберген Сүйінтаев, сондай-ақ республикалық және астаналық триатлон федерацияларының өкілдері қатысты.
Кездесу барысында Қазақстанда триатлонды дамытудың стратегиялық бағыттарына және спортшыларды алдағы ірі додаларға — 2025 жылы Бахрейнде өтетін Жасөспірімдер Азия ойындарына және 2026 жылы Жапонияда өтетін Азия ойындарына дайындауға ерекше назар аударылды.
Қатысушылар жастармен жүйелі жұмыс жүргізудің, өңірлік инфрақұрылымды нығайтудың және федерациялар арасындағы өзара үйлесімділікті арттырудың маңыздылығын атап өтті.
Кездесу аясында пара триатлон мен интеллектуалдық дамуында ерекшеліктері бар жандарға арналған триатлонды дамыту мәселесі де көтерілді. Параатлеттерді іріктеу және қолдау бағытында өңірлік спорт басқармаларының қатысуымен бірлесіп жұмыс жүргізу туралы келісім жасалды.
Алдағы уақытта пара триатлоннан Қазақстан чемпионатын өткізу жоспарланып отыр. Оның қорытындысы бойынша ұлттық құрама жасақталады. Астана қаласының триатлон федерациясы маңызды жарысты қабылдауға және оған қажетті барлық жағдайды жасауға дайын екенін мәлімдеді.
Айта кетейік, триатлон мен пара триатлон бір халықаралық федерация — World Triathlon аясында реттеледі.
