Қытайдың Цзянмэнь қаласында өтіп жатқан 21 жасқа дейінгі жастар арасындағы волейболдан ХХІІІ әлем чемпионатында Қазақстан құрамасы алғашқы жеңісіне қол жеткізді.
Сергей Трикоз баптайтын жас волейболшылар В тобындағы үшінші кездесуінде Пуэрто-Рико құрамасын 3:0 есебімен айқын ұтты. Қарсылас командалар алғашқы екі матчта да жеңіліс тапқан болатын, сондықтан бұл ойында бар күштерін салды.
Партиялар есебі келесідей болды: 25:23, 25:21 және 25:16. Қарқынын үдеткен Қазақстан құрамасы шешуші сәттерде басымдық танытып, тартысты матчта сенімді жеңіске жетті.
Айта кетейік, бұл — Қазақстан жастар құрамасының волейболдан әлем чемпионатындағы тұңғыш жеңісі. Олар бұл турнирге тарихта алғаш рет қатысып отыр.
Келесі матч 25 тамызда Польша құрамасына қарсы өтеді.
