Шымкент қаласында 16–30 тамыз аралығында өтіп жатқан спорттық нысана көздеуден XVI Азия чемпионатында Қазақстан құрамасы сәтті өнер көрсетуде.
21 тамыздағы жағдай бойынша ұлттық құраманың қоржынында 9 медаль бар: 2 алтын, 1 күміс және 6 қола.
Алғашқы алтынды пневматикалық мылтықпен 10 метрге ату жаттығуында Ислам Сатпаев жеңіп алды. Алматы қаласының өкілі әрі Париж-2024 Олимпиадасының қола жүлдегері қытайлық және кореялық қарсыластарын артта қалдырып, Азия чемпионы атанды.
Сол күні юниорлар арасындағы «скит» жаттығуында Артём Седельников алтын медальға ие болды. Ол да Алматыдан шыққан спортшы.
Ал әйелдер арасындағы «скит» жаттығуында Анастасия Молчанова қола жүлде иеленсе, командалық есепте (Ольга Хайлова, Адель Садакбаева, Анастасия Молчанова) Қазақстан құрамасы күміс медаль жеңіп алды.
Пневматикалық тапаншамен атудан да қазақстандықтар жақсы нәтиже көрсетті. ПП-3 жаттығуында юниорлар командасы (Кирилл Федькин, Рамазан Ынтықбай, Кирилл Цуканов) және юниор қыздар командасы (Сауле Алимбек, Кристина Устинова, Асылым Жакия) қола жүлде еншіледі. Қыздар арасындағы ПП-3 жаттығуында да Кира Владимирова, Алиса Краденова және Софья Жукова қола медаль алды.
Сонымен қатар, аралас жұптар сайысында (ПП-микс) Кирилл Федькин мен Сауле Алимбек, сондай-ақ Даниил Смирнов пен Алиса Краденова қола медаль жеңіп алды.
Айта кетейік, чемпионатқа 27 елден 800-ден астам спортшы қатысуда. Турнир барысында 700-ден аса жүлде сарапқа салынады. Чемпионатты Қазақстанның спорттық нысана көздеу федерациясы Мәдениет және спорт министрлігінің қолдауымен ұйымдастыруда.
