Швейцарияның Ньон қаласында 2026/27 жылғы қыздар арасындағы U-19 Еуропа чемпионатының алғашқы іріктеу кезеңіне жеребе тарту рәсімі өтті.
Жеребе қорытындысы бойынша Қазақстанның 19 жасқа дейінгі қыздар құрамасы «В» лигасының 6-тобында өнер көрсетеді. Қазақстандық футболшылар Румыния, Чехия және Польша құрамаларымен бір топқа түсті.
Қазіргі уақытта матчтардың нақты өтетін күндері мен қабылдаушы ел туралы ақпарат жарияланған жоқ. Бұл мәліметтер кейін белгілі болады.
Турнир регламентіне сәйкес, әр топтың жеңімпазы атанған алты құрама және екінші орын алған командалардың ішіндегі ең үздігі келесі іріктеу кезеңінде «А» лигасына көтеріледі.
Осылайша, Қазақстанның жасөспірім қыздар құрамасын алдағы іріктеу кезеңінде мықты қарсыластар күтіп тұр. Команда жоғары нәтиже көрсетіп, Еуропа чемпионаты жолындағы күресті элиталық дивизионда жалғастыруды мақсат етеді.
