Қазақстандық теннисші Юлия Путинцева Индиан-Уэллс қаласында өтіп жатқан беделді халықаралық турнирді жеңіспен бастады.
Әлемдік рейтингте 76-орында тұрған қазақстандық спортшы алғашқы айналымда испаниялық Паула Бадосамен кездесті. Испаниялық теннисші бұған дейін әлем рейтингінде екінші орынға дейін көтерілген, ал қазір 106-сатыда тұр.
Бұған дейін қарсыластар бес рет кездесіп, соның төртеуінде Бадоса жеңіске жеткен болатын. Сонымен қатар ол 2021 жылы Индиан-Уэллс турнирінің чемпионы атанған еді.
Бұл жолы бірінші партияда Путинцева 6:4 есебімен басым түсті. Екінші сетте қазақстандық теннисші 3:0 есебімен алға шығып, кездесуді 6:2 нәтижесімен аяқтады.
Матч барысында Паула Бадоса жиі қателесіп, доп бергенде он рет қосарлы қателік жіберді. Бір сағат 24 минутқа созылған кездесуде Путинцева эйс жасамағанымен, 8 брейк-пойнттың бесеуін сәтті пайдаланды. Ал Бадоса 4 эйс жасап, 2 брейкпен көзге түсті.
Юлия Путинцева келесі айналымда әлемнің 17-ракеткасы, даниялық Клара Таусонмен кездеседі.
Айта кетейік, өткен жылы қазақстандық теннисші бұл турнирде екінші айналымнан аса алмаған еді. 15 наурызда аяқталатын жарыстың жалпы жүлде қоры 9,4 миллион АҚШ долларынан асады.
