ҚЫСҚЫ СПОРТ

Софья Самоделкина АҚШ-тағы Гран-при кезеңінде 11-орыннан бесінші орынға көтерілді

Қазақстандық мәнерлеп сырғанаушы Софья Самоделкина АҚШ-тың Эверетт қаласында өткен Гран-при сериясының кезекті кезеңінде үздік бестікке енді.

Әйелдер арасындағы жекелей сында өнер көрсеткен отандасымыз қысқа бағдарламадан кейін 61,03 ұпаймен 11-орында тұрған еді. Алайда еркін бағдарламада нәтижесін айтарлықтай жақсартып, жалпы есепте алты сатыға жоғарылады.

Самоделкина еркін бағдарламада 137,56 ұпай жинап, осы бағдарлама бойынша төртінші нәтиже көрсетті. Екі бағдарламаның қорытындысында қазақстандық спортшы 198,59 ұпай еншілеп, жарысты бесінші орынмен аяқтады.

Гран-при кезеңінің жеңімпазы Жапония өкілі Ами Накаи атанды. Ол екі бағдарламада жалпы 236,81 ұпай жинап, қарсыластарынан басым түсті.

Күміс медаль бейтарап мәртебеде өнер көрсеткен ресейлік Александра Игнатоваға бұйырды. Оның нәтижесі – 213,90 ұпай.

Ал 211,63 ұпай жинаған тағы бір жапониялық мәнерлеп сырғанаушы Рино Мацуике қола жүлдегер атанды.

Осылайша, Софья Самоделкина қысқа бағдарламадағы 11-орнынан кейін еркін сында сәтті өнер көрсетіп, Эвереттегі Гран-при кезеңін үздік бестікте аяқтады.

Басқа жаңалықтар

Back to top button