Эстонияның Таллин қаласында өтіп жатқан қозғалмалы нысанаға оқ атудан әлем чемпионатында Қазақстан құрамасының қоржыны тағы екі күміс медальмен толықты. Бұл жолы қос жүлде де жасөспірімдер арасындағы жарыста жеңіп алынды.
10 метр қашықтықтан қозғалмалы нысанаға оқ атудан Даниил Яковенко күміс жүлдеге ие болды. Финалда қазақстандық мерген Финляндия өкілі Уильям Эрик Вилкманға жол берді. Ал қола медаль Оңтүстік Корея спортшысы Ким Чжэминге бұйырды.
Қазақстан құрамасының тағы бір өкілі Еңлік Асқар да осы бағдарламада күміс жүлдегер атанды. Финалдық бәсекеде ол Армения спортшысы Аида Азатяннан жеңілсе, үшінші орынды Украина өкілі Мирослава Шимко иеленді.
Айта кетейік, Қазақстан құрамасы бұл әлем чемпионатында жоғары нәтиже көрсетіп келеді. Бұған дейін Фатима Ирназарова мен Валат Мусаев әлем чемпионы атанса, Зухра Ирназарова қола медаль жеңіп алған болатын. Енді Даниил Яковенко мен Еңлік Асқардың күміс жүлделері ұлттық құраманың табысын одан әрі толықтырды.
