Швейцарияның Ньон қаласында 19 жасқа дейінгі жасөспірімдер арасындағы Еуропа чемпионатының 2026/27 маусымындағы екінші іріктеу кезеңіне жеребе тарту рәсімі өтті.
Жеребе нәтижесінде Қазақстанның U-19 құрамасы А лигасының екінші тобына түсті. Қазақстандық жасөспірімдер іріктеу кезеңінде Бельгия, Шотландия және Косово құрамаларымен кездеседі.
Турнир матчтары 11-17 қараша аралығында Шотландия аумағында өтеді. Қазақстан құрамасы келесі кезеңге жолдама алу үшін өз тобындағы жоғары орындардың бірін иеленуге тырысады.
Ереже бойынша А лигасының екінші кезеңінде әр топта алғашқы үш орын алған құрамалар іріктеу турнирінің үшінші кезеңіне өтеді. Оларға В лигасы топтарының жеңімпаздары қосылады.
Үшінші кезеңде 28 құрама төрт командадан жеті топқа бөлінеді. Әр топтың жеңімпазы финалдық кезеңге жолдама алып, жарыс қожайыны Чехия құрамасына қосылады.
Айта кетейік, Қазақстанның U-19 құрамасы жақында ғана Еуропа чемпионаты іріктеуінде сәтті өнер көрсетіп, Португалиямен тең түсіп, Сербияны жеңген болатын. Енді жасөспірімдер құрамасын жаңа кезеңде тағы бір маңызды сынақ күтіп тұр.
