Президент Қасым-Жомарт Тоқаев 15 сәуірде қол қойған «Қазақстан Республикасының кейбір заңнамалық актілеріне дене шынықтыру және спорт, сондай-ақ артық заңнамалық регламенттеуді болғызбау мәселелері бойынша өзгерістер мен толықтырулар енгізу туралы» Заң ресми түрде күшіне енді.
Жаңартылған заңды Туризм және спорт министрлігі әзірлеген. Оның басты мақсаты – спорт саласын жаңғыртып, қаржыны тиімді басқару мен спорт саясатын жүйелеу.
Басты жаңалықтар:
- Командалық спорт клубтарына арналған бюджет лимиттері АЕК-ке байланған. Бұл қаржыландырудың жыл сайын қысқарып кетуіне жол бермейді.
- 60-тан астам спорт түрі басым бағыт ретінде бекітілді. Олардың ішінде Олимпиада, Паралимпиада және ұлттық спорт түрлері бар.
- Федерациялар мәртебесі нақтыланып, аккредитацияға жаңа талаптар енгізілді. Жергілікті федерациялар ұлттық құрам құрамына кіруі тиіс.
- I топтағы мүгедектігі бар спортшылардың көмекшілері заңмен қорғалды.
- Спорт ұйымдары басшылары үшін бес жыл сайын ротация жүйесі енгізілді. Егер аймақта бір ғана ұйым болса, ротация көршілес аудан немесе қала арасында жүзеге асады.
Министрлік қазіргі таңда заңдағы өзгерістерді нақты іске асыруға кіріскен. Бұл реформалар халықаралық ареналардағы нәтиженің төмендеуі мен қаржылық тиімсіздікке жауап ретінде қабылданды.
