Грекияның Афина қаласында 2026 жылғы жазғы жасөспірімдер Олимпиадасының алауын жағу рәсімі өтті. Дакар-2026 Африка құрлығында ұйымдастырылатын алғашқы Олимпиада ойындары болмақ.
Салтанатты шара тарихи «Панатинаикос» стадионында өтті. Олимпиада дәстүріне сәйкес алау күн сәулесінің көмегімен жағылып, кейін Дакар ойындарын ұйымдастыру комитетінің өкілдеріне табысталды.
Халықаралық Олимпиада комитетінің президенті Кирсти Ковентри бұл жарыстың Олимпиада қозғалысы үшін тарихи маңызы бар екенін атап өтті. Оның айтуынша, Сенегалда әлемнің түкпір-түкпірінен жас спортшылар бас қосып, Африка құрлығындағы алғашқы Олимпиадаға қатысады.
Рәсімнен кейін алау Сенегалға аттанды. Оны Дакарға 12 қыркүйекте жеткізу жоспарланған. 14 қыркүйек пен 30 қазан аралығында ел аумағында «Pass the Energy» («Қуатыңмен бөліс») ұранымен алау эстафетасы өтеді. Бағыт Сенегалдың барлық 14 өңірін қамтып, 30-дан астам кезеңнен тұрады.
Эстафета 31 қазанда Диамниадиодағы Абдулай Вад атындағы стадионда өтетін ашылу салтанатымен қорытындыланады. Осы жерде жасөспірімдер Олимпиадасының қазаны жағылады.
Дакар-2026 жасөспірімдер Олимпиадасы 31 қазан мен 13 қараша аралығында өтеді. Жарыстар Дакар, Диамниадио және Сали қалаларында ұйымдастырылып, шамамен 2700 жас спортшы 25 спорт түрінен сынға түседі.
Дакардағы дода жазғы жасөспірімдер Олимпиадасының тарихтағы төртінші басылымы болады.
