Қазақстан Ұлттық Олимпиадалық комитеті мен Қазақстан футбол федерациясының өкілдері кездесіп, футболды дамыту және екі ұйым арасындағы ынтымақтастықты кеңейту мәселелерін талқылады.
Кездесуге Қазақстан ҰОК атынан бас хатшы Әлімжан Ақаев пен Спорт департаментінің директоры Бектұр Қиятбай қатысты. ҚФФ тарапынан бас хатшы Скотт Манн мен бас хатшының кеңесшісі Амантай Байғали болды.
Скотт Манн Қазақстан футболында жоспарланып отырған реформалардың негізгі бағыттары туралы айтып берді. Тараптар футболды коммерцияландыру, клубтарды жекеменшікке беру, әйелдер және жасөспірімдер футболын дамыту мәселелеріне тоқталды.
Кездесуде спорт саласындағы мамандардың кәсіби біліктілігін арттыру және басқару жүйесін жетілдіру мәселелері де қаралды. ҰОК өкілдері Olympic Solidarity бағдарламасы аясындағы мүмкіндіктер мен комитет жүзеге асырып жатқан білім беру жобаларын таныстырды.
Сонымен қатар ҚФФ өкілдеріне Халықаралық Олимпиада комитетімен және халықаралық спорт федерацияларымен ынтымақтастық тетіктері туралы ақпарат берілді. Бұл бағдарламаларды спорт ұйымдарының институционалдық және кадрлық әлеуетін дамытуға пайдалану мүмкіндіктері талқыланды.
Скотт Манн ҚФФ қызметкерлері мен менеджерлерінің ҰОК ұйымдастыратын білім беру бағдарламаларына қатысуға қызығушылық танытып отырғанын жеткізді. Олардың қатарында әкімшілік курстар, гендерлік теңдік пен әйелдер көшбасшылығына арналған бағдарламалар және спорт мамандарының кәсіби біліктілігін арттыру жобалары бар.
ҚФФ бас хатшысы ҰОК бастамаларын қолдауға дайын екенін білдірді. Тараптар алдағы уақытта тәжірибе және кәсіби білім алмасуды кеңейтіп, бірлескен жұмысты жалғастыруға келісті.
