Қазақстан ҰОК мен AMMA аралас жекпе-жек саласындағы бірлескен жобаларды талқылады
23 қыркүйекте Қазақстан Республикасының Ұлттық Олимпиадалық комитетінде Asian Mixed Martial Arts (AMMA) ұйымы мен Mixed Martial Arts ұлттық аралас жекпе-жек федерациясының өкілдерімен ресми кездесу өтті.
Кездесу барысында тараптар құрлықтық деңгейде ұзақ мерзімді әріптестікке дайын екенін атап өтіп, бірлескен жұмыстың негізгі басымдықтарын қарастырды.
AMMA өкілдері Қазақстандағы аралас жекпе-жектің даму қарқынын жоғары бағалап, қазақстандық спортшылардың Азия құрлығындағы алдыңғы қатарлы орнын атап өтті. Айта кетсек, AMMA нұсқасы бойынша өткен жастар арасындағы алғашқы Азия чемпионатында Қазақстан құрамасы 6 алтын, 2 күміс және 3 қола медаль жеңіп алды.
Бұл жарыс 2025 жылы Бахрейнде өтетін жасөспірімдер арасындағы Азия ойындарына іріктеу кезеңі болды. Онда Қазақстан 12 салмақ дәрежесінде бақ сынайды.
2026 жылы Аичи-Нагояда өтетін жазғы Азия ойындарының және Эр-Риядта өтетін Жекпе-жек өнері мен жабық кешендегі Азия ойындарының бағдарламасына аралас жекпе-жек спортын енгізу мәселесіне де ерекше назар аударылды.
Кездесу соңында Қазақстанда AMMA сарапшыларын шақыра отырып, құрлықтық оқу-жаттығу жиындарын өткізу мүмкіндігін қарастыру жөнінде келісім жасалды.
Сондай-ақ 2026 жылғы Азия ойындарының қарсаңында төрешілерге арналған ресми семинарлар сериясын ұйымдастыру жоспарлануда. Бұл бастамалар кадрлық әлеуетті күшейтуге, мамандардың біліктілігін арттыруға және Қазақстан құрамасының басты халықаралық жарыстарға сапалы дайындалуына бағытталмақ.
