Елена Рыбакина Монреаль турнирінде ширек финалға шықты

Қазақстандық теннисші Елена Рыбакина Канаданың Монреаль қаласында өтіп жатқан WTA 1000 санатындағы турнирдің ширек финалына жолдама алды.

Әлемнің 12-ракеткасы мәртебесіне ие қазақстандық спортшы төртінші айналымда украиналық Даяна Ястремскаямен кездесіп, камбэк жасады. Алғашқы сетте 5:7 есебімен есе жіберген Рыбакина келесі партияларда 6:2, 7:5 нәтижесімен жеңіске жетті. Матч жалпы 2 сағат 33 минутқа созылды.

Бұл кездесуде Елена 7 эйс жасап, 9 брейк-пойнттың бесеуін тиімді пайдаланды. Қарсыласы 4 брейкпен шектелді.

Ширек финалда Рыбакина әлемнің 28-ракеткасы украиналық Марта Костюкпен кездеседі. Костюк алдыңғы кезеңде америкалық Маккартни Кесслерді үш сетте жеңген болатын.

Бұл жеңіс Рыбакина үшін маусымдағы маңызды сәттердің бірі саналады.