Теннистен Қазақстан чемпионатының жартылай финалистері белгілі болды

Астанадағы Ұлттық теннис орталығында өтіп жатқан Қазақстан чемпионатында әйелдер арасындағы жартылай финалистер анықталды.

Турнирдің бірінші нөмірлі ракеткасы, WTA рейтингінде 292-сатыда тұрған Жібек Құламбаева ширек финалда Анастасия Крымкованы сенімді түрде 6:2, 6:2 есебімен ұтты. Енді ол жартылай финалда қысқы ел чемпионатының жеңімпазы Іңкәр Дүйсебаймен кездеседі. Іңкәр өз кезегінде Альбина Какенованы 6:3, 6:2 есебімен жеңді.

Екінші жартылай финалда Аружан Сағандықова мен Полина Слепцова жолығады. Аружан 1/4 финалда Асылжан Арыстанбекованы 6:3, 6:1 есебімен қапы қалдырса, Полина жоғары деңгейде өнер көрсетіп, турнирдің екінші нөмірлі ракеткасы Сандуғаш Кенжебаеваны (WTA 980) 6:4, 6:4 есебімен жарыстан шығарды.

Жартылай финалдық ойындар ертең өтеді.