Астанадағы Beeline Arena теннис орталығында өтіп жатқан ересектер арасындағы жазғы Қазақстан чемпионатында ерлер мен әйелдер арасында ширек финалға шыққан спортшылар белгілі болды.
Күннің алғашқы ойынында Қарағанды облысының екі өкілі кездесті: ел чемпионы Григорий Ломакин мен 15 жастағы Родион Трайгель. Жас теннисші бірінші сетте 2:5 есебінен қайта оралып, тай-брейкте 7:6 (7:3) жеңіске жетті. Алайда тәжірибелі Ломакин қалған екі партияда үстемдік етіп, 6:2, 6:0 есебімен жеңді. Ол 1/4 финалда Артем Сидоровпен кездеседі.
Тағы бір қарағандылық Амир Омарханов Даниэль Юреклиді небәрі 47 минутта 6:0, 6:1 есебімен жеңіп, келесі кезеңге жолдама алды. Оның қарсыласы Тимур Сауленко болады.
Тимур Мауленов Таир Сармановты 6:2, 7:6 (9:7) есебімен ұтып, ширек финалда Дамир Дюсенгазинге қарсы ойнайды. Тағы бір жұпты Виталий Зацепин мен Мансур Саинов құрады.
Әйелдер арасында турнирдің бірінші ракеткасы Жібек Құламбаева Еркежан Арыстанбекованы 6:0, 6:0 есебімен оңай ұтты. Ол ширек финалда Анастасия Крымковамен кездеседі.
Қалған жұптар:
- Аружан Сагандыкова – Асылжан Арыстанбекова
- Інкәр Дүсебай – Альбина Какенова
- Сандуғаш Кенжибаева – Полина Слепцова.
