Футболдан УЕФА Конференция лигасының екінші іріктеу кезеңі аясында «Ақтөбе» мен Чехияның «Спарта» командасы кездесті. Матч Ақтөбедегі Орталық стадионда өтіп, кездесуді норвегиялық төрешілер бригадасы басқарды. Ойын басталмас бұрын сарапшылар мен букмекерлер фаворит ретінде прагалық клубты атаған болатын.
Бастапқы минуттарда қонақтар бірнеше қауіпті шабуыл ұйымдастырды, алайда қақпашы Андрей Влад сенімді ойнап, қақпасын аман сақтап қалды. Ал 29-минутта шабуылшы Даниэль Соса айып алаңына келген допты баспен торға бағыттап, есеп ашты — 1:0.
Екінші таймда чехиялық клуб қарқынын үдетті. Алайда 82-минутта Оралхан Өміртаев есепті еселеді — 2:0. Қонақтар тек 90-минутта ғана пенальти арқылы бір доп қайырды. 11 метрлік соққыны Велко Бирманчевич мүлт кетпей орындады — 2:1.
Қарымта матч 31 шілде күні өтеді.
