
Қазақстандық мерген Александра Ле Қатар астанасы Дохада өтіп жатқан нысана көздеуден әлем чемпионатында жетінші орын иеленді.
Отандасымыз әйелдер арасында 50 метр қашықтықтан шағын калибрлі мылтықпен үш қалыпта нысана көздеу сайысында өнер көрсетті. Ол іріктеу кезеңінен өтіп, финалда жүлделі орындар үшін таласуға мүмкіндік алды.
Шешуші кезеңнің қорытындысы бойынша Александра Ле жетінші орынға тұрақтап, әлем чемпионатын үздік сегіздіктің қатарында аяқтады.
Бұл бағдарламада Сербия өкілі Александра Стоядинович әлем чемпионы атанды. Күміс медаль Оңтүстік Корея спортшысы Сехи Оға бұйырды. Ал жапониялық Мисаки Нобата қола жүлдені иеленді.
Жүлделі орындарға ие болған үш спортшы өз елдеріне 2028 жылғы Лос-Анджелес Олимпиадасының жолдамаларын да алып берді.
Осылайша, Александра Ле әлем чемпионатының финалына шыққанымен, жүлдегерлер қатарына ене алмады. Қазақстандық спортшы жарысты жетінші орынмен қорытындылады.



