АУЫР АТЛЕТИКАТРЕНДТЕ

Қазақстан ауыр атлетикадан әлем чемпионатында бір күміс медаль жеңіп алды

Қытайдың Нинбо қаласында өткен ауыр атлетикадан әлем чемпионаты аяқталды. Қазақстан құрамасы дүбірлі додаға жеті спортшы қатыстырып, жарысты бір күміс медальмен қорытындылады.

Ұлттық құраманың жалғыз жүлдесін Нұрғиса Әділетұлы жеңіп алды. Ол 95 келіге дейінгі салмақ дәрежесінде жұлқа көтеруден 182 келіні, серпе көтеруден 217 келіні бағындырды. Қоссайыс қорытындысында 399 келі нәтиже көрсеткен қазақстандық ауыр атлет әлем чемпионатының күміс жүлдегері атанды.

Нұрғиса Әділетұлы жекелеген жаттығуларда да жоғары нәтиже көрсетті. Ол жұлқа көтеру мен серпе көтерудің екеуінде де екінші орын алып, қосымша екі кіші күміс медаль иеленді.

Қазақстан құрамасының өзге спортшылары арасында жүлдеге ең жақын келген Алексей Чуркин болды. Ол 85 келіге дейінгі салмақ дәрежесінде төртінші орын алып, қола медальға бір қадам жетпей қалды.

Любовь Ковальчук 86 келіден жоғары салмақта алтыншы орынға тұрақтады. Ал 110 келіге дейінгі салмақта сынға түскен Артем Антропов қоссайыс қорытындысында 393 келі көтеріп, сегізінші нәтиже көрсетті.

Қазақстандық ауыр атлеттердің әлем чемпионатындағы нәтижелері:

  • Нұрғиса Әділетұлы (95 келі) – 2-орын, 399 келі;

  • Алексей Чуркин (85 келі) – 4-орын;

  • Любовь Ковальчук (+86 келі) – 6-орын;

  • Артем Антропов (110 келі) – 8-орын, 393 келі;

  • Петр Хребтов (75 келі) – 14-орын;

  • Едіге Емберді (85 келі) – 16-орын;

  • Аянат Жұмағали (77 келі) – 19-орын, 227 келі.

Айта кетейік, Нұрғиса Әділетұлы үшін бұл әлем чемпионаттарындағы үшінші жүлде. Қазақстандық зілтемірші 2022 жылы күміс медаль иеленіп, 2024 жылы әлем чемпионы атанған болатын.

Сондай-ақ ол биыл қыркүйекте Жапонияның Аичи және Нагоя қалаларында өткен жазғы Азия ойындарында күміс жүлде жеңіп алған еді.

Осылайша, Қазақстан құрамасы Нинбодағы әлем біріншілігін бір күміс медальмен аяқтады. Жеті спортшының төртеуі өз салмақ дәрежелерінде үздік сегіздікке енді.

Басқа жаңалықтар

Back to top button