Футзалдан Чемпиондар лигасының ширек финалында қазақстандық «Семей» мен «Қайрат» командалары қарымта матчтарын өткізеді.
Семейлік клуб бүгін сағат 20:00-де өз алаңында Францияның «Этуаль» командасымен кездеседі. Ал алматылық «Қайрат» клубы сырт алаңда Испанияның «Картахена» командасына қарсы ойнайды. Бұл матч Қазақстан уақытымен 00:30-да басталады.
Екі кездесу де «Qazsport» телеарнасынан тікелей эфирде көрсетіледі.
Айта кетейік, алғашқы ойындарда қазақстандық клубтар қарсыластарына жол берген еді. «Семей» өз алаңында француз командасына 4:5 есебімен ұтылса, «Қайрат» испаниялық клубқа 1:2 есебімен есе жіберді.
Бұған дейін 1/8 финалда «Қайрат» Бельгияның «Андерлехт» клубын екі матчтың қорытындысы бойынша 7:3 және 5:3 есебімен жеңіп, келесі кезеңге шыққан болатын. Ал «Семей» Польшаның «Пяст» командасымен кездесіп, 3:3 және 5:3 нәтижелерімен ширек финалға жолдама алған еді.
Биыл футзалдан Чемпиондар лигасының элиталық кезеңінің форматына өзгерістер енгізілді. Бұл кезеңде 16 команда сегіз жұпқа бөлініп, өз алаңында және сырт алаңда бір-бір ойын өткізеді.
Ширек финалдық кездесулер 2026 жылдың 23 ақпаны мен 6 наурызы аралығында өтеді. Ал турнирдің шешуші кезеңі 2026 жылдың мамыр айында Италияның Песаро қаласында ұйымдастырылады. Онда төрт команда жартылай финал, финал және үшінші орын үшін матчтарда бақ сынайды.
