Қазақстанның жасөспірімдер арасындағы қыздар құрамасы шайбалы хоккейден Әлем чемпионаты аясында қатарынан үшінші жеңісіне қол жеткізді. Стамбулда (Түркия) өтіп жатқан IIA дивизионындағы турнирде ұлттық құрама алаң иелері — Түркия командасынан басым түсті.
Кездесу алғашқы минуттардан-ақ тартысты өтті. Ойынның орта тұсына дейін есеп ашылған жоқ. Дегенмен екінші кезеңде қазақстандық хоккейшілер қарқынын күшейтіп, қарсылас қақпасына үш шайба соқты.
34-минутта Түркия құрамасына буллит орындау мүмкіндігі беріліп, олар бір голмен жауап қатты. Алайда үшінші кезеңде Қазақстан құрамасы тағы екі мәрте мергендік танытып, матчты 5:1 есебімен сенімді түрде аяқтады.
Осылайша қазақстандықтар бұған дейінгі Жаңа Зеландия мен Латвияға қарсы жеңістерінен кейін турнирдегі үшінші табысына қол жеткізді. Келесі ойында ұлттық құрама Нидерланд командасына қарсы мұз айдынына шығады.
