3 қыркүйекте Астанада Азия Олимпиадалық кеңесінің (АОК) VI Құрлықтық спортшылар форумы өз мәресіне жетті. Шара Olympic Solidarity бағдарламасы аясында ұйымдастырылды.
Форумның екінші күнгі негізгі тақырыптары спорттағы әділдік пен қауіпсіздік болды.
Әділдік мәселелері
Жарыс нәтижелерін манипуляциялаудың алдын алу бойынша өткен сессияны АОК Спортшылар комиссиясы төрағасының орынбасары Шива Кешаван, АОК Спортшылармен жұмыс департаментінің менеджері Джамьянг Намгьял және Қазақстан Ұлттық Олимпиадалық комитеті Спорт департаментінің жетекші менеджері Айым Жетібаева жүргізді.
Антидопинг сессиясы
Форумда АОК Антидопинг департаменті мен Дүниежүзілік допингке қарсы агенттік (WADA) өкілдері тыйым салынған препараттарды қолдануға қарсы күрестегі жаңалықтарды таныстырды. Ombuds Anti-Doping бағдарламасы алғаш рет көрсетіліп, кейін қатысушылар топтық талқылауға қатысты.
Қауіпсіз спорт ортасы
Кездесуде спорттағы зорлық-зомбылықтың алдын алу және спортшылардың құқықтарын қорғау мәселелері қозғалды. Бұл бағыттағы тәжірибесімен Сабина Факхури, Хера Лиу, Сяйрах Латиф және Роуз Лантиксе бөлісті. Спортшылар комиссиясының қауіпсіз орта қалыптастырудағы рөлі де атап өтілді.
Қатысушылар
Форумға Азияның 42 Ұлттық Олимпиадалық комитетінен, Халықаралық Олимпиадалық комитет пен АОК басшылығынан 120-дан астам делегат қатысты.
Қосымша шара
Форум аясында «Аичи-Нагоя 2026» Азия ойындарын насихаттау мақсатында Fun Run атты символдық жүгіру ұйымдастырылды.
