«Барыс» Иван Ромазан мемориалындағы алғашқы жеңісіне қол жеткізді

Елордалық «Барыс» хоккей клубы Ресейдің Магнитогорск қаласында өтіп жатқан Иван Ромазан мемориалында алғашқы жеңісіне қол жеткізді. Бүгін команда турнирдің екінші матчында Уфаның «Салават Юлаев» клубымен кездесіп, овертаймда 4:3 есебімен басым түсті.

Кездесудің алғашқы минуттарынан-ақ командалар белсенді шабуылмен ерекшеленді. Алдымен, 10-минутта уфалық Прохор Корбит есеп ашты. Алайда көп ұзамай «Барыстың» жаңа ойыншысы, АҚШ-тан келген шабуылшы Майкл Веккьоне 11-минутта есепті теңестіріп, алғашқы кездесуінде-ақ көзге түсті.

Екінші кезеңде Әлихан Әсетов дубль жасап, 21 және 31-минуттарда командасын алға шығарды. Дегенмен, қарсылас та қарап қалмады: Данил Аляхин (34′) мен Александер Хмелевски (50′) өз командасын ойынға қайта оралтты.

Негізгі уақыт 3:3 есебімен аяқталған соң, овертаймда шешуші сәт туды. Елордалық клуб сапынан Дінмұхамед Қайыржан жеңіс шайбасын соғып, «Барысқа» алғашқы жеңісті сыйлады.

Осыған дейін «Барыс» турнирдің алғашқы ойынында «Металлургке» 1:2 есебімен жол берген болатын. Енді команда үшінші ойынын 29 тамыз күні «Металлургпен» қайта өткізеді. Кездесу Астана уақытымен сағат 19:00-де басталады