Юсуф Ашрапов грек-рим күресінен әлем чемпионатының қола жүлдегері атанды

Болгарияның Самоков қаласында өтіп жатқан грек-рим күресінен 20 жасқа дейінгі спортшылар арасындағы әлем чемпионатында қазақстандық Юсуф Ашрапов (72 келіге дейін) қола медаль жеңіп алды.

Үшінші орын үшін белдесуде отандасымыз грекиялық Арионас Колицопулосты 2:0 есебімен сенімді жеңді.

Турнир барысында Ашрапов алғашқы айналымда армениялық балуан Гаспар Тертерянға есе жіберген болатын (1:3). Алайда қарсыласы финалға дейін жетіп, чемпион атанғандықтан, қазақстандық балуанға жұбаныш белдесуіне қатысу мүмкіндігі берілді.

Юсуф бұл мүмкіндікті сәтті пайдаланды: алдымен болгариялық Сергей Стоевті 8:3 есебімен, кейін әзербайжандық Сеймур Гасимовті 5:3 есебімен тізе бүктірді.

Осылайша, Ашрапов Қазақстан құрамасының қоржынына үшінші медальді салды. Бұған дейін Диас Сейітқалиев (82 келіге дейін) алтын, Арсен Жұма (55 келіге дейін) қола жүлде иеленген еді.