Ербол Мырзабосынов семсерлесуден әлемдік жетістікке жеткен команданы марапаттады
Қазақстан Республикасының Туризм және спорт министрі Ербол Мырзабосынов Тбилисиде өткен семсерлесуден әлем чемпионатында қола жүлдеге ие болған Ұлттық құрамамен кездесті.
Министр Руслан Курбанов, Вадим Шарлаимов, Эльмир Әлімжанов пен Кирилл Проходов сынды спортшыларды тарихи жетістікпен құттықтап, үшінші орын үшін кездесуде Франция құрамасын жеңген команданың ерлігін ерекше атап өтті.
Сондай-ақ Ербол Мырзабосынов Қазақстан семсерлесу федерациясының президентіне және Мемлекеттік жаттықтырушы Тимур Байтасовқа алғысын білдіріп, құраманың табысына шетелдік маман Александр Горбачуктың қосқан үлесін ерекше атады.
— Жүйелі жұмыстың арқасында Ұлттық құрама әлемнің үздік бестігінің қатарына енді. Бұл — отандық спорттағы жаңа дәстүрдің бастамасы, — деді министр.
Қосалқы құрам мүшесі Ерлік Сертай да назардан тыс қалмады — министр оның да жеңіске жету жолындағы рөлін атап өтті.
Айта кетейік, 2023 жылы Қазақстан құрамасы Азия ойындарында күміс, ал 2024 жылғы Париж Олимпиадасында алтыншы орын иеленген болатын.
