Таиланд астанасы Бангкок қаласында өтіп жатқан бокстан жастар арасындағы Азия чемпионатының үшінші күні аяқталды. Жарыс World Boxing ұйымының ұйымдастыруымен өтуде.
Кезекті күн қорытындысы бойынша Қазақстан құрамасы алғашқы жүлдеге қол жеткізді. 48 келіге дейінгі салмақта сынға түскен Гүлназ Бөрібаева жапониялық Нон Госогаваны нокаутпен жеңіп, кемі қола медальді қоржынға салды.
Сол күні рингке шыққан Сымбат Әлиасқар (54 кг) өкінішке қарай, Тайбэй боксшысы Чинь Линь Чуға есе жіберіп, жарысты аяқтады.
Ерлер арасында үш боксшы алдын ала кезеңдегі жекпе-жектерін өткізді. 60 келіге дейінгі салмақта өнер көрсеткен Әділет Төртубек үндістандық Шубхамды айқын басымдықпен ұтып, келесі кезеңге өтті. Ал 55 келідегі Әділбек Қожахан тайваньдық Чиа Фен Пенге, 65 келідегі Мұхит Нұрқабылұлы үндістандық Маусам Сухагқа есе жіберіп, турнирмен қоштасты.
