Қазақстан құрамасы көркем гимнастикадан Румыниядағы беделді турнирге қатысады

Қазақстандық көркем гимнастика шеберлері 25-27 шілде аралығында Клуж-Напока (Румыния) қаласында өтетін World Challenge Cup турнирінде өнер көрсетеді. Бұл дода Халықаралық гимнастика федерациясының (FIG) ресми күнтізбесіне енген және оған 42 елден 200-ге жуық спортшы қатысады деп жоспарлануда.

Қазақстан атынан сегіз спортшы сынға түседі. Жекелей бағдарламада Айбота Ертайқызы мен Айым Мейіржанова ел намысын қорғаса, топтық жаттығуларда төмендегі спортшылар өнер көрсетеді:

• Айда Хәкімжанова
• Айзере Кеңес
• Жасмин Жүнісбаева
• Кристина Чепульская
• Айзере Нұрмағамбетова
• Мадина Мырзабай

Еске салайық, Қазақстан құрамасы бұған дейін Сингапурда өткен Азия чемпионатында тамаша нәтиже көрсетіп, топтық және жекелей сында 2 алтын, 1 күміс және 2 қола медаль жеңіп алған еді.