Әлемнің 40 елінің әскери қызметшілері қазақ күресінен әлем чемпионатына қатысады

14-15 тамыз күндері Астанада алғаш рет әскери қызметшілер арасындағы қазақ күресінен әлем чемпионаты өтеді.

Тарихи дода Халықаралық әскери спорт кеңесінің (CISM) қолдауымен ұйымдастырылып отыр. Бұл ұйым – әлемдегі ең ірі көпсалалы әскери спорттық бірлестіктердің бірі.

Чемпионатты Қорғаныс министрлігінің Спорт комитеті – Армияның орталық спорт клубы мен Қазақстан Республикасының Туризм және спорт министрлігі бірлесіп өткізеді.

Жарысқа шамамен 40 елдің өкілдері қатысады деп күтілуде. Бұл – қазақ күресінің халықаралық деңгейде кеңінен танылып келе жатқанын дәлелдейді. Турнир ұлттық спорт түрін әлемдік спорт картасында ілгерілетудің маңызды қадамы болмақ.

Бәсекелер «Qazaqstan» жеңіл атлетикалық спорт кешенінде өтеді.