Қазақстан құрамасы Словениямен жолдастық кездесу өткізеді

Бүгін Қазақстанның шайбалы хоккей құрамасы 2025 жылғы әлем чемпионаты алдындағы соңғы дайындық аясында Словениямен жолдастық кездесу өткізеді, деп хабарлайды Sportm.kz.

Матч Қазақстан уақытымен 20:40-та басталады. Бұл екі құрама арасындағы алтыншы ойын болмақ. Бұған дейінгі бес кездесудің үшеуінде Қазақстан жеңіске жетсе, екі мәрте Словения басым түскен.

7 мамыр күні қазақстандық хоккейшілер Данияның Хернинг қаласына жол тартып, әлем чемпионатына қатысады. Жарыс барысында Қазақстан құрамасы В тобында өнер көрсетеді. Қарсыластар тізімі: Финляндия, Чехия, АҚШ, Германия, Дания, Норвегия және Мажарстан.

Қазақстан құрамасының топтық кезеңдегі алғашқы ойыны 10 мамырда Норвегияға қарсы өтеді. Басталуы — 15:20.

Ал Словения құрамасы чемпионатта А тобында Швецияның Стокгольм қаласында ойнайды. Олар Канада, Швеция, Швейцария, Словакия, Латвия, Австрия және Франция құрамаларымен шеберлік байқасады.